Stefán Þór Ágústsson stóð sig vel í marki Vals í 1-1 jafntefli við Vestra í fyrstu umferð Bestu deildarinnar í gær, en það vakti athygli að hann væri í byrjunarliðinu.

Ögmundur Kristinsson gekk í raðir Vals síðasta sumar en var á bekknum í gær. Srdjan Tufegdzic eða Túfa, þjálfari Vals, sagði í viðtölum í gær að hann hafi verið að glíma við smávægileg meiðsli í fyrir tímabil.

Stefán átti sem fyrr segir flottan leik í Valsliði sem heilt yfir olli vonbrigðum, varði hann vel þegar á hann reyndi og spil hans út frá marki var þá til fyrirmyndar.

Þetta var til að mynda rætt í hlaðvarpinu Dr. Football, en þar sagði Arnar Sveinn Geirsson, fyrrum leikmaður Vals og mikill stuðningsmaður liðsins, að þarna væri mögulega kominn nýr aðalmarkvörður.

„Stefán Þór var virkilega flottur. Ég held að Ömmi verði bara í veseni með að komast aftur inn í þetta,“ sagði hann.

Stefán gekk í raðir Vals frá Selfoss fyrir síðustu leiktíð en hann var aðeins að spila sinn annan Bestu deildarleik í gær.