Það vantar nokkra öfluga leikmenn í lið Real Madrid sem mætir Arsenal annað kvöld í fyrri leik liðanna í 8-liða úrslitum Meistaradeildar Evrópu.
Fyrri leikurinn fer fram á Emirates á morgun og þrátt fyrir að vera án nokkurra nafna fengu stuðningsmenn Real Madrid þær frábæru fréttir að markvörðurinn Thibaut Courtouis sé kominn aftur fyrir leikinn.
Belginn hefur misst af síðustu þremur leikjum vegna meiðsla og þurfti Real Madrid að nota þriðja markvörð sinn í tapinu gegn Valencia í síðasta leik þar sem Andriy Lunin er nú líka frá.
Fyrrum Arsenal maðurinn Dani Carvajal, Eder Militao, Dani Ceballos og Ferland Mendy hafa þá allir verið frá undanfarið og ná þeir ekki leiknum á morgun.
Þá verður Real Madrid einnig án Aurelien Tchouameni þar sem hann er í banni í fyrri leiknum.
Arsenal hefur einnig verið að glíma við meiðsli og verður til að mynda án hins afar mikilvæga Gabriel, miðvarðar síns, út tímabilið.
