Magnús Már Einarsson, þjálfari Aftureldingar, ræddi við Stöð 2 Sport í kvöld eftir leik sinna manna við Breiðablik.

Leikurinn tapaðist 2-0 á erfiðum útivelli og má segja að Íslandsmeistararnir hafi átt sigurinn skilið.

Afturelding komst upp í Bestu deildina síðasta sumar og fékk svo sannarlega erfiða byrjun gegn sterkum Blikum.

• ,,Að einhverju leyti var spennustigið of hátt. Um leið og skrekkurinn fór úr okkur í seinni hálfleik þá var meiri bragur á okkur og meira hugrekki. Við hefðum átt að byrja þetta sterkari,“ sagði Magnús við Stöð 2 Sport.

,,Það sem pirrar mig mest að við náðum ekki að spila meira, við náðum ekki að koma okkur ofar, það fór í taugarnar á mér. Við náðum ekki að búa til færi fyrr en undir lok fyrri hálfleiks.“

,,Við fórum yfir það í hálfleik að við þyrftum að vera hugrakkari og þora að spila, við þurftum að vera hugaðari. Við höfðum engu að tapa 2-0 undir eftir fyrri hálfleik. Þetta var frumsýning sem kannski sat í mönnum í byrjun.“

Magnús ræddi svo bróður sinn, Anton Ara Einarsson, sem átti frábæran leik í marki Breiðabliks í kvöld.

,,Hann var góður sko en hérna, það var pirrandi að hann hafi verið að verja. Ég er yfirleitt ánægður með þegar hann er að verja en í dag var ég ekki alveg nógu ánægður. Hann var góður, hann má eiga það.“