Sjónvarpsmaðurinn geðþekki, Ríkharð Óskar Guðnason er hættur að halda með Real Madrid í spænska boltanum. Ástæðan er hegðun leikmanna liðsins um helgina.
Real Madrid tapaði gegn Barcelona í úrslitum spænska bikarsins en úrslitin voru ekki klár fyrr en eftir framlengdan leik.
„Þetta var svaka barátta og það var hiti,“ sagði Ríkharð Óskar í Þungavigtinni í dag.
Allt sauð upp úr í restina þar sem þrír leikmenn Real Madrid fengu rautt spjald en Antonio Rudiger virtist ætla að drepa dómarann. Hann kastaði hlutum í átt að honum og reyndi að hjóla í hann en var haldið.
„Ég ætla að tilkynna það hér með að ég hef alltaf haldið með Real Madrid á Spáni, ég er hættur því. Ég hata þetta lið, þetta er ótrúlegt. Carlo Ancelotti hlýtur að telja dagana þangað til að hann fari frá þessu,“ sagði Ríkharð.
Hann vonast eftir því að varnarmaðurinn öflugi fái langt bann. „Ég vona að Rudiger fái tíu mánaða bann. Hann hlýtur að fá margra mánaða bann.“
