Ange Postecoglou, stjóri Tottenham, viðurkennir að hann átti sig á að hluti stuðningsmanna sé búinn að missa traustið til hans.

Ástralinn tók við Tottenham fyrir síðustu leiktíð og fór vel af stað en síðan hefur farið að halla undan fæti. Liðið er nú fast í neðri hluta ensku úrvalsdeildarinnar, dottið úr báðum bikarkeppnunum á Englandi en er að vísu enn með í Evrópudeildinni.

Stuðningsmenn hafa áður látið óánægju sína í ljós á heimavelli Tottenham og Postecoglou meira að segja rifist við einhverja þeirra.

„Það liggur enginn vafi á því að stór hluti stuðningsmanna hefur ekki jafnmikla trú og áður á því sem við erum að gera. Þeim leist á það sem þeir sáu í fyrra en það sama hefur ekki verið uppi á teningnum í ár,“ segir Postecoglou.

„Ég er samt mjög bjartsýnn ennþá. Ég held að við komumst yfir þetta og verðum mun betri. Ef við gerum það verðum við sterkari en áður.“