Paul Pogba á að reyna fyrir sér með Norwich á næstu leiktíð. Þetta segir sparkspekingurinn og fyrrum knattspyrnumaðurinn Chris Sutton.

Pogba losnaði úr banni vegna ólöglegrar lyfjanotkunar í síðasta mánuði og leitar að nýju liði. Hann hefur ekki spilað keppnisleik síðan í september 2023 og því misst næstum tvö heil tímabil úr.

Það vill því ekki hver sem er taka sénsinn á franska miðjumanninum, sem eitt sinn var einn sá besti í heimi og lék með Manchester Untited og Juventus.

Pogba er 32 ára gamall og ætlar sér að spila lengur. Sutton, sem lék til að mynda með Norwich, sem og Chelsea, Aston Villa, Celtic og fleirum á ferlinum, vill sjá hann klæðast gulu treyjunni í ensku B-deildinni á næstu leiktíð.

„Ég myndi elska að sjá Pogba hjá Norwich. Ef ég á að vera hreinskilinn hefur hann misst mikið úr og á þessum aldri er erfitt að ná aftur fyrri hæðum,“ segir Sutton.

„Hann er mjög hæfileikaríkur og telur sig sennilega geta spilað á hæsta stigi fótboltans áfram. Ég held það yrði erfitt eftir allan þennan tíma. En hann getur tekið skref til baka og spilað með Norwich.“