Styrmir Sigurðsson, stjórnandi hlaðvarpsins Handkastsins, var gestur þeirra Helga Fannars Sigurðssonar og Hrafnkels Freys Ágústssonar í Íþróttavikunni á 433.is.

Það hefur mikið verið rætt og ritað um mark sem Örvar Eggertsson skoraði fyrir Stjörnuna í 2-1 sigri á FH í Bestu deildinni um síðustu helgi og verið deilt um hvort boltinn hafi verið inni eður ei.

„Það er bara einn maður í línu við þetta (línuvörðurinn) og hann sér hann inni,“ sagði Helgi í þættinum.

Styrmir er alls ekki sannfærður. „Þessi mynd sem birtist af þessu segir mér enn frekara að hann hafi ekki séð þetta. Örvar leikur þetta frábærlega.“

„Ég held það sé það sem skilaði þessu marki,“ skaut Hrafnkell inn í áður en Styrmir tók til máls á ný.

„En af hverju í fjandanum er ekki komin marklínutækni í þessa deild? Þetta gæti orðið risastórt, stig fyrir þennan hóp FH hefði getað verið stórt í fyrstu umferð.“