Afturelding er í efstu deild karla í fyrsta sinn og er Steindi Mosfellingur og mikill stuðningsmaður liðsins. Guðmundur mætti í heimsókn til Steinda, Auðuns Blöndal og Egils Einarssonar í FM95Blö í síðustu viku, degi áður en Besta deildin hófst.
Þar var spáð í spilin fyrir komandi leiktíð og taldi Guðmundur að nýliðar Aftureldingar færu niður aftur. Síðan eru þeir búnir að spila opnunarleik tímabilsins gegn Breiðabliki. Tapaðist hann 2-0 í Kópavoginum.
Í umræðunni um Bestu deildina lýsti Guðmundur yfir áhyggjum fyrir hönd Aftureldingar fyrir komandi leiktíð. „Erum við þá að tala um 5. – 7. sæti eða?“ spurði Steindi þá, en það er niðurstaða sem flestir Mosfellingar myndu líklega sætta sig við.
Guðmundur var þó fljótur að kippa leikaranum og grínistanum niður á jörðina. „Nei ég er að tala um að þið séuð að fara að falla.“
Steinda varð verulega brugðið við að heyra þetta. „Nei, Gummi! Þú getur ekki komið hérna inn og látið svona,“ sagði hann og benti síðar á að Afturelding hefði valtað yfir FH í æfingaleik í vetur.
„Það var í byrjun febrúar,“ sagði Guðmundur þá.
Allt var þetta auðvitað á afar léttum nótum en það er ljóst að Steindi hefur mikla trú á sínum mönnum fyrir tímabilið í Bestu deildinni.
