Maður að nafni Oluwasanmi Odelusi eða Sanmi Odelusi eins og hann er þekktur undir er líklega á leið á bakvið lás og slá fyrir nauðgun.

Um er að ræða leikmann sem einhverjir gætu kannast við en Odelusi spilaði á sínum tíma fyrir Bolton í næst efstu deild Englands og á einnig að baki þónokkra leiki í þriðju efstu deild.

Odelusi hefur ekki spilað fótbolta frá árinu 2020 en hann hefur nú verið ákærður fyrir nauðgun sem á að hafa átt sér stað 2021.

Samkvæmt enskum miðlum þá nauðgaði Odelusi ungri konu sem var undir áhrifum áfengis og nýtti sér yfirburði sína á meðan hún var sofandi.

Atvikið átti sér stað eftir hitting um kvöldið þann 26. nóvember 2021 en konan var um tíma óviss hvort hún myndi kæra þennan fyrrum atvinnumann – hún lét að lokum verða að því.

Konan mætti ásamt vinkonu sinni í leigða íbúð þar sem Odelusi framkvæmdi meint brot en þau höfðu drukkið mikið áfengi þetta kvöld.

Greint er frá því að Odelusi hafi upphaflega með samþykki sofið hjá vinkonu stelpunnar en færði sig síðar í annað herbergi þar sem fórnarlambið svaf.

Fórnarlambið var sofandi er Odelusi braut á henni en hún vaknaði um tíma en átti í erfiðleikum með að átta sig á því hvað nákvæmlega væri í gangi.

Nauðgunin er sögð hafa átt sér stað klukkan sex um morguninn en fyrrum leikmaðurinn harðneitar sök og segist ekki hafa brotið af sér á neinn hátt.