Rebecca Loos, fyrrum aðstoðarkona David Beckham sem hann á að hafa haldið framhjá Victoriu Beckham með, hefur á ný tjáð sig um málið.

David á að hafa haldið framhjá með Loos eftir að hann gekk í raðir Real Madrid frá Manchester United 2003. Hún var aðstoðarkona hans en fjölskylda David flutti ekki út til spænsku höfuðborgarinnar fyrst um sinn.

Í heimildaþáttum um Beckham segja hann og eiginkona hans að í kjölfar ásakananna hafi tekið við erfiðasta tímabil í lífi þeirra. Beckham hefur alltafn neitað sök, en Loos opnaði sig um málið í viðtali við Sky árið 2004.

Loos er gestur í nýjasta þætti 60 minutes í Ástralíu. Þar opnar hún sig um málið og bakkar hvergi frá fullyrðingum sínum um framhjáhaldið.

„Að mínu mati sýndi ég mikið hugrekki með því að fara upp á móti þeim. Ég hef alltaf haldið mig við sannleikann og ekki ýkt neitt,“ sagði Loos þar meðal annars.

„Ég fór gegn valdamesta parinu í fjölmiðlum sem höfðu allan pening í heiminum. Það eina sem ég hafði með mér í liði var sannleikurinn.“

Þess má geta að í dag er Loos tveggja barna móðir og er hún búsett í Noregi.