Ingvar Jónsson hefur framlengt samning sinn við Víking út 2026 og tekur því slaginn með liðinu næstu tvö tímabil hið minnsta.
Markvörðurinn hefur verið algjör lykilmaður í velgengni Víkings undanfarin ár og ljóst að það er mikilvægt fyrir liðið að reynsluboltinn framlengi.
Annar mikilvægur hlekkur í liði Víkings, Helgi Guðjónsson, framlengdi sinn samning fyrir helgi.
Tilkynning Víkings
Kæru Víkingar. Ingvar Jónsson og Knattspyrnudeild Víkings hafa framlengt samning sinn út árið 2026. Ingvar þarf ekki að kynna fyrir neinum sem hefur horft á fótbolta síðustu 10 árin eða svo. Ingvar er fæddur árið 1989 og kom til félagsins frá danska liðinu Viborg árið 2020. Ingvar varð Íslandsmeistari árin 2021 og 2023 með Víking og hefur 3 sinnum lyft Mjólkurbikarnum. Hann var einnig lykilmaður í árangri liðsins í Sambandsdeild Evrópu veturinn 2024-2025.
Í sumar mun Ingvar rjúfa 200 leikja múrinn fyrir Víking og fyrir Ísland hefur Ingvar leikið 8 A landsleiki og samtals 4 leiki fyrir U19 og U21 lið Íslands.
Gefum Kára Árnasyni yfirmanni knattspyrnumála orðið:
„Það að Ingvar framlengi sinn samning við okkur er algjörlega frábært enda teljum við hann vera besta markmanninn í Bestu deildinni. Hann hefur heldur betur stigið upp þegar við höfum þurft á honum að halda og ég er hrikalega ánægður með að hann verði hér næstu 2 tímabil hið minnsta.“
Frábær tíðindi kæru Víkingar! ❤️🖤 Hér að neðan má svo sjá hinar ýmsu myndir af Ingvari í Víkingstreyjunni.
