Landsleikur Íslands gegn Kósóvó, sem tapaðist 2-1, var gerður upp í Íþróttavikunni hér á 433.is. Þar var Sigurbjörn Hreiðarsson gestur Helga Fannars og Hrafnkels Freys.
Það vakti athygli margra fyrir leik að Albert Guðmundsson, Orri Steinn Óskarsson, Hákon Arnar Haraldsson og Andri Lucas Guðjohnsen væru allir í byrjunarliði Íslands í leiknum.
„Er rembingur að ætla að koma þessum fjórum öllum fyrir?“ spurði Helgi í þættinum, en sóknaruppleggið gekk ekkert allt of vel í leiknum.
„Þú ert með Orra, Albert og Hákon inn á. Þá er það spurning hvað þú ætlar að gera við Andra. Stundum þarftu að setja menn á bekkinn. Það er alveg ljóst að við erum í góðum málum í þessari stöðu, með þessa leikmenn,“ sagði Sigurbjörn og skaut Hrafnkell inn í að Andri ætti að fara á bekkinn.
Sigurbjörn nefndi mann sem gæti byrjað úti á kanti í hans stað.
„Ég er alltaf rosalega hrifinn af Jóni Degi, hann er ótrúlega öflugur liðsmaður og ég sakna hans þegar hann byrjar ekki,“ sagði hann, en Jón Dagur kom inn á sem varamaður í leiknum.
Umræðan í heild er í spilaranum.
