Þorkell Máni Pétursson, fyrrum útvarpsmaður og stjórnarmaður hjá KSÍ í dag, segir það óboðlegt að Ísland eigi ekki betri heimavöll í knattspyrnu. Hann ræddi málið í Fréttum vikunnar á Bylgjunni í dag.

Máni var að ræða um fótboltann og þá staðreynd að heimaleikur landsliðsins á sunnudag gegn Kosóvó fer fram á Spáni.

Verið er að laga Laugardalsvöll en KSÍ fær 500 milljónir til að laga grasflötina og Máni er ekki sáttur með að sambandið fái ekki meiri fjármuni til að fara í frekari framkvæmdir.

„Við erum að spila heimaleik á Spáni sem er til skammar. Við erum að fá vallaraðstæður, að fá völl fyrir 500 milljónir. Þetta er enn ein vitleysan, það á byggja þjóðarhöll fyrir 12-15 milljarða. Knattspyrnan á að sætta sig við 500 milljónir fyrir nýjan völl,“ sagði Máni.

Hann segir þetta ekki boðlegt, fótboltinn sé sú íþrótt sem komi með langmesta fjármuni inn í íslenskt samfélag. „Þetta er sú íþróttagrein sem skilar mestum tekjum inn í samfélagið. Atvinnumenn koma heim með peninga, við seljum leikmenn út. Víkingur kemur heim með 800 milljónir í tekjur vegna árangurs í Evrópu sem kemur inn í samfélagið, þetta er fáránlegt,“ sagði Máni.

Hann sagði svo að ríkið og sveitarfélög ættu að horfa meira í það hvernig hlutirnir eru gerðir í Svíþjóð. Sonur Mána spilar sem atvinnumaður þar í landi og hefur hann því kynnst málinu betur síðustu vikur.

„Nú er ég mikið í Svíþjóð og Toddi (Þorvaldur Örlygsson, formaður KSÍ) er alltaf að segja mér að ég sé að verða of sænskur. Þar eru þrír stærstu klúbbarnir í Gautaborg á sama vellinum, eru með aðalvöll og spila þar og æfa annars staðar.“

„Í Reykjavík erum við með 9 félög, þar þurfa allir sína aðstöðu og yfirbyggða höll fyrir sig og alvöru völl. Þetta er af því að þessir opinberu starfsmenn eru alltaf að redda öllum, allir þurfa að finna aumingjann í sjálfum sér og væla yfir því hvað þeir eru mikil fórnarlömb. Þora ekki að vera stjórnmálamenn sem segja nei, að það sé ekki til fyrir þessu.“