Valur tilkynnti í dag að Patrick Pedersen væri búinn að framlengja við félagið um eitt ár. Gildir samningur hans nú því út næstu 2026 með möguleika á árs framlengingu.

Patrick hefur verið Val gríðarlega mikilvægur í meira en áratug, raðað inn mörkum og þetta eru því mikil gleðitíðindi fyrir Hlíðarendafélagið.

Tilkynning Vals
Vi har Pedersen út 2026

Markamaskínan og okkar allra besti Patrick Pedersen hefur framlengt samning sinn við Val út árið 2026 með möguleika á ársframlengingu. Patrick skrifaði undir samninginn á Hlíðarenda í dag og sagðist gríðarlega ánægður.

„Valur er auðvitað minn klúbbur og ég get ekki séð mig spila fyrir neinn annan klúbb,“ sagði Patrick sem verður 34 ára gamall í nóvember.

Samningurinn sem Patrick skrifaði undir í dag er fimmti samningurinn sem hann gerir við okkur í Val enda verið lykilmaður hjá okkur síðustu árin og staðið sig afskaplega vel. Hann vantar nú 16 mörk til þess að vera markahæsti leikmaður efstu deildar frá upphafi og hann er meðvitaður um það.

„Markmiðið er auðvitað að slá það met. Við sjáum hvort það gangi ekki örugglega,“ sagði Patrick léttur í bragði.

Patrick Pedersen hefur spilað fyrir val frá því hann var 22 ára gamall. „Það var auðvitað algjört forgangmál hjá okkur í stjórn að endursemja við Patrick sem er ekki bara besti heldur lang besti framherjinn í deildinni. Það er erfitt að hugsa sér valsliðið án hans og við viljum auðvitað að hann klári sinn feril í Val. Þetta er gleðidagur fyrir allt valsfólk.“