Kári Árnason, fyrrum landsliðsmaður, segir að þær breytingar sem Arnar Gunnlaugsson landsliðsþjálfari er að gera á liðinu megi ekki taka of langan tíma.

Arnar tók við í vetur og stýrði Íslandi í fyrsta sinn í 2-1 tapi gegn Kósóvó í gær. Um var að ræða fyrri leik liðanna í umspili um sæti í B-deild Þjóðadeildarinnar en frammistaða Íslands var ekki sannfærandi.

„Þetta tekur tíma, ef þú ætlar að breyta og verða possesion lið. Ég þekki það á eigin skinni, við vorum í bullandi fallbaráttu áður en þetta fór að ganga,“ sagði Kári á Stöð 2 Sport eftir leik, en hann spilaði auðvitað undir stjórn Arnars hjá Víkingi um skeið.

„Hefur íslenska þjóðin þolinmæði fyrir þessu? Þetta snýst um úrslit fyrst og fremst. Það er öllum sléttsama um fagurfræði ef þú nærð ekki í úrslit. Þú getur sagt að þetta sé besta leiðin til að ná í úrslit en það má ekki taka tvö ár.“

Seinni leikur liðanna, eiginlegur heimaleikur Íslands, fer fram á Spáni á sunnudag.