Víkingur hefur veirið sektaður um 120 þúsund krónur af KSÍ og dæmt 3-0 tap gegn Keflavík, en liðin mættust á föstudag í Lengjubikarnum.
Víkingur vann leikinn 5-0 þau úrslit munu ekki standa því Þórdís Hrönn Sigfúsdóttir, sem gekk í raðir liðsins frá Val á dögunum, spilaði en var enn skráð í Hlíðarendafélagið.
Þar með missir Víkingur, sem hafnaði í þriðja sæti Bestu deildarinnar í fyrra, sæti í undanúrslitum Lengjubikarsins. Fer það til FH.
Af heimasíðu KSÍ
Í leik Víkings R. og Keflavíkur., í Lengjubikar kvenna, sem fram fór þann 14. mars tefldi lið Víkings R. fram ólöglegum leikmanni.
Þórdís Hrönn Sigfúsdóttir spilaði með Víking R. í leiknum en var skráð í Val. Af þessum sökum hefur Víkingur R. verið sektað um 120.000 krónur. Úrslitum leiksins er breytt í 0-3 Keflavík í vil.
Úr reglugerð Lengjubikarsins (Deildarbikarkeppni KSÍ):
10.1 Lið, sem mætir ólöglega skipað til leiks, skal sæta sekt að upphæð kr. 60.000 og að auki kr. 60.000 fyrir hvern leikmann sem ekki hefur keppnisleyfi með viðkomandi félagi og tekur þátt í leiknum. Félag, sem notar leikmann, þjálfara eða forystumann í leikbanni, skal sæta sektum að upphæð kr. 100.000.
11.2 Félag, sem notar leikmann sem ekki hefur keppnisleyfi með því eða notar leikmann, þjálfara eða forystumann í leikbanni, telst hafa tapað leiknum með markatölunni 0-3 nema tap hafi verið stærra, þá skal sú markatala ráða. Staðfesti skrifstofa KSÍ að þátttakandi hafi verið óhlutgengur í leik skal mótanefnd þegar í stað skrá úrslit leiksins skv. ofangreindu og tilkynna það viðkomandi félögum. Heimilt er að kæra slíka skráningu til aga- og úrskurðarnefndar KSÍ og skal kærufrestur telja frá þeim degi sem tilkynningin er gefin út.
