Þættirnir eru sýndir beint á Youtube og stýrir Hjörvar Hafliðason ferðinni. Þar er fylgst með enska boltanum og því sem er í gangi í beinni á laugardögum, en einnig er farið um víðan völl og fjörlegar umræður eiga sér stað. Allt saman á afar léttum nótum þó.
Þá geta áhorfendur sent inn athugasemdir og það var einmitt það sem hratt af stað misskilningi um að Arnór Ingvi Traustason þyrfti að draga sig úr landsliðshópnum fyrir komandi leiki og að Gylfi Þór Sigurðsson kæmi inn í hans stað.
Áhorfandi sendi þetta inn í gríni og sagan uppspuni frá rótum. Arnór Ingvi er ekki meiddur og lék allan leikinn gegn Hacken í sænska bikanum í gær. Þetta rataði hins vegar í fjölmiðla á laugardag.
„Ég vissi ekki alveg hvort þetta væri djók eða ekki því Arnar fór út af á 105. mínútu í leiknum áður. Ég gaf mér að þetta væri eitthvað bull og sagði í útsendingunni að svona allt væri staðfest á heimasíðu KSÍ, við þyrftum að fara varlega,“ segir Hjörvar um málið í nýjasta þætti hlaðvarpsins Dr. Football.
„Það hefur einhver komið inn í þetta í miðju spjalli og látið Fótbolta.net vita. Arnór Ingvi rankar bara við sér, búinn að draga sig úr landsliðshópnum vegna meiðsla. Allt út af einhverju svona bulli,“ segir Hjörvar enn fremur, léttur í bragði.
„Youtube-menningin er stutt komin á Íslandi og við skulum passa okkur á þessu.“
