Valið á Bjarka Steini Bjarkasyni í íslenska landsliðið var til umræðu í hlaðvarpsþættinum Dr. Football í dag. Ástæðan er sú að hann er sagður vera tengdasonur Bjarka Gunnlaugssonar, umboðsmanns knattspyrnumanna og fyrrum landsliðsmanns.

Bjarki er tvíburabróðir Arnars Gunnlaugssonar sem kynnti sinn fyrsta landsliðshóp á miðvikudag. Arnar tók við landsliðinu á dögunum og hefur verið að undirbúa sitt fyrsta verkefni síðustu vikur.

Umræðan var á þann veg að líklega ætti Dagur Dan Þórhallsson leikmaður Orlando í MLS deildinni skilið sæti í hópnum á kostnað Bjarka Steins sem leikur með Venezia á Ítalíu.

„Þetta væri alls staðar rætt, Bjarki Steinn er tengdasonur Bjarka Gunnlaugssonar sem er tvíburabróður Arnars. Ég er búin að fá 1237 skilaboð um þessi mál, fólkið í kringum Dag Dan skilur þetta ekki hvernig hann er ekki þarna inni,“ sagði Hjörvar Hafliðason um málið.

Gunnar Birgisson íþróttafréttamaður hjá RÚV fór yfir það hvað Bjarki hefði spilað mikið á þessu tímabili.

„Þetta eru níu leikir, 159 mínútur í Seriu A. Byrjar tímabilið meiddur, missti af fyrstu tólf leikjunum. Hann er oft geymdur á bekknum allan tímann, það mesta sem hann hefur spilað eru 76 mínútur gegn Parma í janúar. Þetta er óheppilegt,“ sagði Gunnar.

Bjarki tengdafaðir Bjarka er umboðsmaður knattspyrnumanna og starfar fyrir eina stærstu skrifstofu í heimi. „Dagur Dan er ekki hjá Stellar,“ sagði Gunnar um það en Bjarki starfar hjá Stellar.

„Við vitum hvernig danska, norska og sænska medían virka. Ef tengdasounr bróður Stale Solbakken (Þjálfari Noregs) væri í hópnum á kostnað annars leikmanns, þá væri það rætt,“ sagði Hjörvar um málið.

Gunnar segir Dag hafa spilað frábærlega í MLS deildinni undanfarið. „Við erum meira að spyrja út í þetta vegna þess hvernig Dagur Dan hefur verið að spila í MLS deildinni, meira spurningin um Dag Dan frekar en að kasta rýrð á valið á Bjarka. Hann er frábær leikmaður.“