Lögreglan á höfuðborgarsvæðinu var kölluð út í gærkvöldi en pirraður stuðningsmaður Liverpool hafði þá verið með læti og höfðu nágrannar aðilans áhyggjur.

Þetta kemur fram í færslu lögreglunnar en Liverpool féll úr leik gegn PSG í Meistaradeild Evrópu í gær.

Leikurinn fór í vítaspyrnukeppni þar sem Liverpool tapaði.

„Reglulega berast lögreglu kvartanir vegna hávaða og gærkvöldið var engin undantekning í þeim efnum. Að þessu sinni var það vegna Liverpool-aðdáenda sem fóru á límingunum þegar liðið þeirra tapaði í vítaspyrnukeppni eftir framlengdan leik í Meistaradeildinni. Að tapa með þeim hætti er sárt og því fylgja stundum öskur og læti enda vonbrigðin gríðarleg hjá eldheitum stuðningsmönnum,“ segir í færslu lögreglu.

„Engum varð þó meint af í þeim tveimur málum, sem sinnt var vegna þessa í gærkvöld, en þá höfðu áhyggjufullir nágrannar hringt í lögregluna eftir að óhljóð höfðu borist á milli íbúða.“

Lögreglan tekur fram að stuðningsmenn Liverpool séu ekki þeir einu sem lenda í svona. „Til að gæta allrar sanngirni skal tekið fram að útköll sem þessi eru ekki einvörðungu bundin við stuðningsmenn Liverpool, nei síður en svo.“