Maður að nafni Emanuele Marra lenti í ansi undarlegu atviki á sínum tíma er hann var þjálfari hjá AS Roma á Ítalíu.

Marra var um tíma í þjálfarateyminu hjá félaginu en hann sá um leikmenn eins og Francesco Totti og Mohamed Salah sem er í dag hjá Liverpool.

Marra labbaði eitt sinn inn í búningsklefa Roma þar sem hann kom að Totti og Salah í sturtunni þar sem þeir léku sér með fótbolta.

Það er ekki beint algengt að knattspyrnumenn taki þá áhættu að leika sér með knöttinn í sturtuklefanum en Marra hafði ekkert nema góða hluti að segja um þessa tvo leikmenn.

Totti er að sjálfsögðu goðsögn í knattspyrnusögunni en hann hefur lagt skóna á hilluna eftir mjög farsælan feril hjá Roma.

,,Það eru tveir leikmenn sem var sérstaklega gaman að þjálfa og það voru Totti og Salah. Eftir æfingar þá kom ég að þeim í sturtunni þar sem þeir voru að rekja bolta,“ sagði Marra.

,,Þetta útskýrir fyrir þér hversu mikið þeir elska leikinn og af hverju þeir gerðu það sem þeir gerðu. Að leika sér með bolta á þessum stað var ekki beint að hjálpa tækninni, þeir gerðu þetta bara því þeir elska að leika sér með bolta.“