Aron Jóhannsson, leikmaður Vals, var gestur í nýjasta þætti Íþróttavikunnar á 433.is. Helgi Fannar Sigurðsson og Hrafnkell Freyr Ágústsson hafa umsjón með þættinum.

Það var komið inn á íslenska karlalandsliðið í þættinum, en Aron er spenntur fyrir framhaldinu nú þegar Arnar Gunnlaugsson er tekinn við.

„Ég er spenntur fyrir því. Það sem hann er búinn að gera með Víking undanfarin ár er frábært og fáheyrt,“ sagði Aron.

„Það eru komnir rosalega margir ungir og efnilegir strákar. Við þurfum aðeins að einblína á varnarlínuna og finna okkar 4-6 menn þar sem spila alla leiki. Ég held að Arnar sé frábær í því að greina veikleika hjá fótboltamönnum, lágmarka þá og hámarka styrkleika.“

HM verður haldið á næsta ári í Bandaríkjunum, Kanada og Mexíkó. Aron hefur trú á að Ísland verði með þar.

„Það er klárlega möguleiki. Það er alltaf verið að bæta við liðum þarna og virðist vera nóg að vinna 1-2 leiki til að komast á HM, það þurfa bara að vera réttu leikirnir. Við eigum meiri möguleika með Arnar en við höfðum áður.“

Aron er auðvitað fyrrum landsliðsmaður Bandaríkjanna og þekkir því vel til knattspyrnumenningarinnar þar í landi. Hann telur að HM á næsta ári þar í landi verði alvöru sýning.

„Ég held þetta verði alveg vel ýkt. Ef það er einhver sem getur búið til sýningu er það Kaninn. Það er líka meðbyr með landsliðinu í Bandaríkjunum. Þeir eru búnir að vera ungir og efnilegir í nokkur ár. Það var horft á 8-10 ára vegferð með þessa stráka, að þeir myndu hámarka sína frammistöðu á HM 2026. Sem er auðvitað vel grillað, ef tveir slíta krossband er áætlunin farin. En ef það er einhver sem er spenntur fyrir þessu er það Kaninn og það væri auðvitað geðveikt ef Ísland verður með.“