Henry Birgir Gunnarsson hefur um langt skeið starfað sem íþróttafréttamaður og verið farsæll í starfi, hann ræddi tíma sína í hlaðvarpinu Svona var sumarið.

Henry var þar að ræða samskipti við landsliðsþjálfara í fótbolta í gegnum tímana og fór þá að ræða um atvik þar sem hann óttaðist að landsliðsmaður í fótbolta ætlaði að berja sig.

Atvikið átti sér stað fyrir mörgum árum síðan þegar landsliðið gekk í gegnum erfiða tíma.

„Eftirminnilegasta sagan þegar allt var í mesta hundaskítnum, þá var ég búin nokkrum mánuðum áður að biðja um viðtal við ákveðinn leikmann. Hann lofaði að gefa mér það þegar hann kæmi til landsins með landsliðinu,“ sagði Henry Birgir í viðtalinu.

Umræddur leikmaður var mættur til landsins og Henry vildi svör við spurningum sínum. Henry starfaði á DV á þessum tíma þar sem stunduð var hörð en sanngjörn blaðamanneska.

„Ég hafði þá tilfinningu að hann ætlaði ekkert að gefa mér það viðtal, ég bíð því fyrir utan fundarherbergi og hann ætlaði að sjálfsögðu ekkert að gefa mér viðtalið. Ég labba með honum út ganginn með diktafón og hann er á harðahlaupum að reyna að komast undan að lyftunum.“

Þegar þarna var komið sauð allt upp úr, annar leikmaður landsliðsins steig inn í málið. „Þegar við nálgumst lyfturnar þá kemur annar leikmaður landsliðsins og það fauk í hann, ég er frekar rólegur en hann alls ekki rólegur. Ég finn að hann er að gera sig líklegan til að kýla mig á, ég sá fyrir mér forsíðuna daginn eftir að blaðamaður hefði verið kýldur á hóteli landsliðsins.“

Þegar allt var að sjóða upp úr þá birtist sá þriðji. „Þriðji maðurinn kom svo úr lyftunni og það var leikmaður sem ég þekkti mjög vel frá fyrri tíð og heilsaði mér, þá fór loftið úr blöðrunni.“

Henry sagði svo síðar í þættinum að þessu sögu hefði hann aldrei sagt áður en vildi ekki nafngreina leikmennina sem þarna komu við sögu.