Það fór ekki framhjá mörgum þegar Sigmar Vilhjálmsson sagði frá því um síðustu helgi að honum og hóp sem hann var með hafði verið vísað af vellinum á leik Manchester City gegn Liverpool. Þetta var rætt í hlaðvarpinu Dr. Football í dag.
Sigmar er mikill stuðningsmaður Liverpool og sá liðið vinna City 0-2 í ensku úrvalsdeildinni um helgina. Hann og hópurinn sem hann var með sátu hins vegar á meðal stuðningsmanna City og var þeim vísað út í kjölfar þess að 12 ára drengur í hópnum fagnaði fyrra marki Liverpool lítillega, að sögn Sigmars. Sjálfur slapp hann þar sem hann var á salerninu er hópnum var vísað á dyr.
Auðunn Blöndal var gestur Hjörvars Hafliðasonar í Dr. Football í dag og sagði frá því þegar hann lenti í svipaðri uppákomu fyrir nokkrum árum. Auðunn er stuðningsmaður Manchester United og sat á meðal Chelsea stuðningsmanna í leik liðanna. Gaf hann lítillega í skyn að hann væri sáttur er Wayne Rooney skoraði mark fyrir United í leiknum.
„Þá sagði einhver að það væri einhver United „wanker“ í stúkunni. Það kom öryggisvörður og sagði við mig að hann væri ekki að reka mig af vellinum en að það væri samt sniðugt fyrir mig að fara. Ég spurði hvort ég mætti vera aðeins lengur og það var ekkert mál en svo komu fleiri með honum og sögðu að ég yrði að fara. Það átti að berja mig,“ sagði Auðunn.
Hjörvar þekkir það vel að ferðast á leiki á Englandi og segir umræðuna fína lexíu fyrir þá sem hafa hugsað sér að skella sér á leik úti.
„Þetta er ágætis skóli fyrir menn því það er alveg stutt í þetta,“ sagði hann í þætti dagsins.
Hér að neðan má sjá Auðunn lýsa atburðarásinni
