Leikarinn frægi Stephen Graham kom frænda sínum í ansi mikinn bobba nú á dögunum eftir leik í ensku neðri deildunum.

Graham hefur leikið í mörgum þekktum kvikmyndum í Hollywood en nefna má myndir eins og Snatch og Gangs of New York.

Frændi leikarans spilar með liði Barrow Town í utandeildinni á Englandi og fyrir um tveimur mánuðum var Graham sjálfur á hliðarlínunni.

Leikarinn missti svo sannarlega stjórn á skapi sínu í þessum leik sem varð til þess að sjö stig voru tekin af Barrow í deildarkeppninni.

Dómarinn David Kennedy þurfti að fresta viðureigninni um tíma vegna látbragða Graham sem kallaði hann á meðal annars ‘gagnslausan stubb.’

Graham benti margoft á að dómarinn væri í yfirþyngd og spurði þá einnig: ‘Hvað er að þér, varstu lagður í einelti í grunnskóla?’

Málið hefur verið í rannsókn undanfarna tvo mánuði en enska knattspyrnusambandið hefur nú tekið ákvörðun varðandi refsinguna og mun hún standa.

Graham er sjálfur talinn sjá eftir sinni hegðun og hefur beðið frænda sinn afsökunar á hegðun sinni.