Arnór Smárason sem ráðinn var yfirmaður knattspyrnumála hjá Val í lok árs mun taka að sér nýtt hlutverk nú um mánaðarmótin.

„Fjölskyldan hefur tekið ákvörðun um að flytja til Svíþjóðar en konan mín er sænsk. Ég mun því ekki geta sinnt því mikilvæga og krefjandi starfi sem það er að vera yfirmaður knattspyrnumála hjá félagi eins og Val. Ég er þakklátur fyrir tækifærið en mun vera stjórninni áfram innan handar í afmörkuðu verkefni,“ segir Arnór Smárason.

Arnór verður tæknilegur ráðgjafi knattspyrnudeildar og mun halda áfram vinnu við innleiðingu á nýrri stefnu í samvinnu við sænska ráðgjafafyrirtækið GoalUnit, en sú vinna er vel á veg komin.

„Arnór hefur komið inn af miklum krafti og samstarfið gengið vel. Hann hafði samband við mig fyrir rúmum tveimur vikum og tjáði mér að hann gæti ekki sinnt starfinu í óbreyttri mynd. Auðvitað hefðum við viljað hafa hann áfram hjá okkur en við sýnum þessari ákvörðun hans fullan skilning. Fjölskyldan á alltaf að vera í fyrsta sæti en sem betur fer munum við njóta krafta hans áfram í breyttu hlutverki sem við munum móta með honum,“ segir Björn Steinar Jónsson formaður knattspyrnudeildar Vals.