Knattspyrnugoðsögnin Sif Atladóttir hefur verið ráðin framkvæmdastjóri Leikmannasamtaka Íslands. Hún tekur við af Kristni Björgúlfssyni.
Tilkynning LSÍ
Leikmannasamtök Íslands halda áfram að efla réttindi leikmanna enn frekar með ráðningu Sifjar Atladóttur sem framkvæmdastjóra samtakanna. Sif tekur við starfinu af Kristni Björgúlfssyni, stofnanda LSÍ, sem hefur sinnt starfi framkvæmdastjóra frá stofnun þess árið 2014. Kristinn mun áfram sitja í stjón LSÍ sem og að sinna störfum innan samtakanna. Sif var ráðin inn sem verkefnastjóri samtakanna árið 2022 og hefur sinnt margvíslegum verkefnum, og tekur nú við sem framkvæmdastjóri.
Sif þarf vart að kynna, en hún hefur leikið 90 landsleiki fyrir Íslands hönd, keppt á fjórum Evrópumótum og lék 12 ár í atvinnumennsku á erlendri grundu. Hún hefur ekki aðeins reynslu sem leikmaður heldur einnig sem öflugur talsmaður leikmanna. Árið 2020 var hún kjörin í stjórn leikmannasamtakanna í Svíþjóð þar sem hún lagði mikla áherslu á íþróttakonur og barneignir.
Sif lauk BS-gráðu í lýðheilsuvísindum frá háskólanum í Kristianstad árið 2018 og hóf nám í íþróttavísindum við háskólann í Kalmar/Vaxjö ári síðar. Árið 2023 tók Sif sér námsleyfi frá náminu í Svíþjóð þar sem hún fékk inngöngu í nám hjá UEFA fyrir fyrrum alþjóðlega leikmenn í Sport Management (UEFA MIP Program). Með alþjóðlega reynslu sem atvinnumaður, stjórnarmaður í leikmannasamtökum Svíþjóðar sem og þátttakandi í þessu UEFA námi hefur Sif allt sem þarf til að leiða LSÍ inn í framtíðina.
Ráðning Sifjar sendir skýr skilaboð um að hagsmunir íþróttafólks á Íslandi verði áfram settir í forgang hjá samtökunum og er mikilvægt skref fyrir allt íþróttafólk á Íslandi. LSÍ eru hagsmunasamtök leikmanna og með komu Sifjar eru leikmenn komnir með enn sterkari rödd..
LSÍ hlakkar til spennandi tíma með Sif í broddi fylkingar.
Fyrir nánari upplýsingar:
Arnar Sveinn Geirsson, Forseti Leikmannasamtaka Íslands
arnar@leikmenn.is
Sif Atladóttir, Framkvæmdastjóri Leikmannasamtaka Íslands
sif@leikmenn.is
Kristinn Björgúlfsson, fráfarandi framkvæmdastjóri Leikmannasamtaka Íslands
Kristinn@leikmenn.is
