Um helgina fóru af stað sögusagnir um að Elon hefði áhuga á að fjárfesta í Liverpool. Hann er nokkuð tengdur borginni, en amma hans er þaðan. Errol Musk, faðir hans, staðfesti síðar áhuga sonarins.
„Hann hefur sagst hafa áhuga á því. Það þýðir samt ekki að það gangi eftir,“ sagði Errol meðal annars um málið.
Meira
Faðir Elon Musk staðfestir óvænt tíðindi af syninum
Egill er stuðningsmaður Liverpool en tilhugsunin um að Musk eignist félagið finnst honum ekki mjög spennandi.
„Ég held með Liverpool. Það er eiginlega fáránlegt. Lið af þessu tagi eru í eigu auðmanna, þetta eru fyrirtæki, leikmennirnir sumir þéna meira á mánuði en við gerum flest á heilli ævi. Þeir eru málaliðar, ganga kaupum og sölum fyrir himinháar fjárhæðir – tryggð þeirra gagnvart félögunum er ekkert sérstök,“ segir Egill í pistli á Facebook.
„Ég fór að fylgjast með þessu og halda með Liverpool á ungum aldri. Kannski af því félagið var frá Bítlaborginni eða vegna þess að það spilaði Evrópuleik gegn KR nánast í árdaga boltans. Það voru dálítið aðrir tímar. En enn ræð ég ekki alveg við þetta – ég kætist þegar Liverpool vinnur, finnst leiðinlegt þegar liðið tapar, þótt ég vildi í raun að mér væri alveg sama. Mér finnst þetta heldur ekkert sérlega gaman.“
Kaupi Musk Liverpool sér Egill jákvæðu hliðarnar á því öllu saman.
„Ef Elon Musk kaupir Liverpool get ég hætt þessu. Ég verð laus – alveg samstundis,“ skrifar Egill.
