Sheffield United hefur ákveðið að hlusta ekki á um tvö þúsund stuðningsmenn félagsins sem vilja minnast fyrrum leikmanns kvennaliðs félagsins, Maddy Cusack, á almennilegan hátt.

Um tvö þúsund undirskriftir hafa safnast þar sem beðið er um að enska félagið muni leggja númerið átta til hliðar til minningar um Cusack sem spilaði með Sheffield í fjögur ár.

Cusack var aðeins 27 ára gömul er hún lést en hún hafði verið einn allra mikilvægasti leikmaður liðsins frá 2019 til 2023.

Cusack er sögð hafa tekið sitt eigið líf en hún er fædd í Nottingham á Englandi og spilaði einnig með liðum eins og Aston Villa, Birmingham og Leicester.

Undirskriftalistinn virðist hafa haft engin áhrif á Sheffield sem hefur vakið athygli og fá viðbrögð félagsins gagnrýni á samskiptamiðlum.

Rachel Iball sem stofnaði listann hefur brugðist við fréttunum og hafði þetta að segja um málið að sögn Athletic:

,,Hvernig getur eitt félag sýnt svona mikla vanvirðingu? Ég er í sjokki yfir þessari ákvörðun, þetta er það sem við, stuðningsmennirnir, viljum.“