Marcus Rashford hefur fengið vörn úr óvæntri átt en fyrrum enski landsliðsmaðurinn Carlton Cole hefur tjáð sig um hans stöðu hjá Manchester United.

Cole hefur lagt skóna á hilluna í dag en starfar sem sparkspekingur og liggur yfirleitt ekki á sínum skoðunum.

Cole gagnrýnir Ruben Amorim, stjóra United, fyrir hvernig hann hefur komið fram við Rashford og þá sérstaklega það sem hann hefur sagt opinberlega um leikmanninn sem fær engar mínútur þessa stundina.

Amorim sagði það á dögunum að hann hefði frekar valið 63 ára gamlan markmannsþjálfara á bekkinn frekar en Rashford.

,,Ég vil fá að vita hvað er í gangi. Hann er að drepa Rashford og er einnig að lækka verðmiðann,“ sagði Cole.

,,Rashford er dýrmætur leikmaður. Ef þú vilt selja hann þá af hverju myndirðu segja þetta opinberlega?“

,,Að mínu mati er Amorim frekar barnalegur í þessu máli og hugsar með sér að hann sé stjórinn og að hann ráði.“