Kári Árnason, yfirmaður knattspyrnumála hjá Víkingi, er bjartsýnn fyrir leikjunum gegn Panathinaikos í Sambandsdeildinni í næsta mánuði en viðurkennir að það sé pirrandi að fá ekki að spila heimaleikinn hér á landi.

Víkingur er kominn í útsláttarkeppni Sambandsdeildarinnar eftir frábæran árangur í deildarkeppninni fyrir áramót. Liðið mætir gríska stórliðinu 13. og 20. febrúar.

„Eins og ég sagði við leikmannahópinn finnst mér við vera með Rolls-Royce leikmannahóp, þvílíkt flottan og þann allra sterkasta á Íslandi. Ég er gríðarlega spenntur fyrir þessu einvígi, deildinni og öllu sem er að koma,“ sagði Kári, en hann ræddi við 433.is í tilefni að ráðningu Sölva Geirs Ottesen í stöðu aðalþjálfara í gær.

Fyrri leikurinn er heimaleikur Víkings en ekki er enn ljóst hvar hann fer fram. Víkingur spilaði heimaleiki sína í deildarkeppninni á Kópavogsvelli á undanþágu, en fékk hana ekki áfram fyrir útsláttarkeppninni.

„Auðvitað er það alveg glatað en það er ekkert hægt að velta sér upp úr því. Vonandi lagast þetta á næstu árum því með þessari Sambandsdeild tel ég bara líklegra að lið komist þangað annað eða þriðja hvert ár. Við verðum að vera með eitthvað plan B, þetta gengur ekki svona,“ sagði Kári enn fremur.

Ítarlegra viðtal við Kára, þar sem ráðning Sölva og fleira er til umræðu, er í spilaranum.