Lúðvík Jónasson, fyrrum leikmaður Stjörnunnar, er ekki hrifinn af því sem er í gangi hjá sínu liði undir stjórn Jökuls Elísabetarsonar.

Lúðvík telur samsetninguna á liðinu skrýtna og að Jökull sé ekki maðurinn í að koma Stjörnunni í toppbaráttu.

„Við erum að verða Barcelona Bestu deildarinnar, kaupum bara miðjumenn, bara sexur. Það er bara spurning hvernig við ætlum að spila úr þessu. Svo erum við með einn afdankaðan Andra Rúnar. Ég hefði nú verslað annan framherja,“ sagði Lúðvík í Þungavigtinni.

„Við erum með Guðmund Nökkva, sem getur svosem spilað áttuna líka, en hann er sexa. Alex (Þór) er sexa, Samúel (Kári) er sexa. Flestir miðjumennirnir okkar eru sexur.“

Þáttastjórnandinn Ríkharð Óskar Guðnason spurði Lúðvík hvort Stjarnan væri með lið í að berjast um efstu 3-4 sætin í Bestu deildinni í sumar.

„Jú, jú. Við erum bara ekki með þjálfara í það. Ég myndi vilja annan þjálfara. Mér finnst hann ekki spila góðan bolta, er með mjög skrýtnar myndlíkingar í sínum ræðum. Ég held það viti enginn hvað hann er að gera þarna,“ sagði Lúðvík þá.

„Maður sem er alltaf að tala um að spila á svæðum og vera betri þarna, þetta er mjög einfaldur leikur. Þú þarft að skora fleiri mörk en andstæðingurinn. Hann er ekkert að segja hvaða kerfi hann er að spila eða hvernig hann er. Hann er að nota leikmenn í rangar stöður, prófa þá inn í miðju móti og svona, sem er bara tóm tjara.“

Stjarnan hafnaði í fjórða sæti Bestu deildar karla í fyrra, 2 stigum frá Val sem tók síðasta Evrópusætið.