Arsenal horfir í kringum sig eftir framherja í janúarglugganum, enda krýsa í gangi er varðar færanýtingu og þá eru meiðsli fram á við.

Ekki bætti úr skák að Gabriel Jesus, sem hefur staðið sig vel undanfarnar vikur, bættist á meiðslalistann gegn Manchester United í gær. Fór hann af velli eftir 40 mínútur í leiknum, sem tapaðist í vítaspyrnukeppni, og gæti verið frá í töluverðan tíma.

Independent segir nú að áhugi Arsenal á hinum sjóðheita Viktor Gyokeres hjá Sporting hafi aukist. Hann kostar 80 milljónir punda og Arsenal sá frekar fyrir sér að nota slíka fjárhæð í sumar. Félagið gæti þó neyðst til að verja henni nú.

Gyokeres er kominn með 32 mörk á leiktíðinni. Hann hefur einnig verið orðaður við fleiri lið, svosem Manchester United þar sem hans fyrrum stjóri, Ruben Amorim, er við stjórnvölinn.

Þá er Benjamin Sesko, framherji RB Leipzig sem var sterklega orðaður við Arsenal í sumar, einnig nefndur til sögunnar í Independent.