Bjarki Már Elísson, landsliðsmaður á handbolta, var gestur Helga Fannars og Hrafnkels Freys í nýjasta þætti af Íþróttavikunni á 433.is.

Bjarki er að sjálfsögðu á leið á HM með Strákunum okkar og fór hann um víðan völl í þættinum. Algengt er að handboltamenn hiti upp á æfingum með því að fara í fótbolta og var Bjarki spurður að því hverjir sköruðu fram úr þar.

„Við erum með marga mjög góða. Aron (Pálmarsson) er með svakalegt „touch“ en hann er bara of mikill skrokkur stundum. Hann er meira öðrum megin á vellinum, en frábær í fótbolta,“ sagði Bjarki.

„Ég ætla að gefa Janusi Daða þetta. Hann er einhvern veginn samanrekinn, með svaðalegar mjaðmir og góður að stíga menn út. Viktor Gísli gæti verið miðvörðu í fótbolta. Hann myndi ekki tapa skallaeinvígi og góður á boltanum.“

Óðinn Þór Ríkharðsson er sá slakasti að mati Bjarka. „Hann er það slakur að við settum hann í markið,“ sagði hann léttur.

Hrafnkell þjálfaði Óðinn í yngri flokkum í fótbolta um skeið og kom honum á óvart þegar hann frétti að kappinn væri ekki í miklum metum á meðal handboltamanna þegar kemur að knattspyrnulegri getu.

„Ég sagði einhvern tímann í Dr. Football að hann væri góður og skilaboðin sem ég fékk frá KA-mönnum voru rosaleg. Bara: Hvað ertu að segja? Hann er ömurlegur,“ sagði Hrafnkell, en Óðinn lék um tíma með KA hér heima.

Umræðan í heild er í spilaranum.