Kobbie Mainoo yrði sennilega fimmti launahæsti leikmaður Manchester United ef hann skrifar undir nýjan samning.

Töluverð umræða hefur verið um framtíð hins 19 ára gamla Mainoo undanfarið, en hann er talin ein af stjörnum framtíðarinnar á Old Trafford. Hann hefur hins vegar verið tregur til að skrifa undir nýjan samning og vill fá um 200 þúsund pund í vikulaun geri hann svo.

Chelsea fylgist náið með gangi mála og er sagt klárt í að kaupa hann ef miðjumaðurinn skrifar ekki undir þegar fram líða stundir. Enn eru þó tvö og hálft ár eftir af samningi Mainoo.

United er að reyna að styrkja stöðu sína gagnvart fjárhagsreglum og þar myndi félagið stórgræða á því að selja Mainoo þar sem hann er uppalinn leikmaður.

Fari svo að Mainoo skrifi undir og United gangi að launakröfum hans yrði hann á meðal fimm launahæstu manna félagsins. Sem Stendur er Casemiro launahæstur með 350 þúsund pund á viku. Þar á eftir koma Bruno Fernandes og Marcus Rashford með 300 þúsund pund. Mason Mount er svo með 250 þúsund og Antony með 200 þúsund, sömu laun og Mainoo og hans fulltrúar sækjast eftir.