Þorri Mar Þórisson hefur ekki fengið mínútu á vellinum hjá Stjörnunni í fyrstu tveimur umferðum Bestu deildarinnar. Þorri kom heim úr atvinnumennsku í vetur.

Bakvörðurinn knái var ónotaður varamaður í fyrstu umferð og var svo settur út úr hóp gegn ÍA í annari umferð.

„Þetta kom á óvart, hann var ekki í hóp. Í standi en ekki í hóp,“ sagði Ríkharð Óskar Guðnason í Þungavigtinni í dag.

Kristján Óli Sigurðsson gaf lítið fyrir þau orð hjá Jökli Elísabetarsyni að Þorri væri ekki komin inn í hlutina í Garðabæ.

„Hann er ekki kominn nógu mikið inn í hlutina segir Jökull, það tekur tíma inn í lið sem sparkar langt og tekur föst leikatriði sem priority. Það tekur eflaust tíma fyrir Þorra að komast inn í það.“

Mikael Nikulásson fyrrum þjálfari KFA tók síðan til máls en hann ræddi um orð Jökuls um að Þorri hefði fagnað manna mest eftir sigurinn á ÍA.

„Gaman að sjá að Þorri hafi fagnað manna mest, ég held að það sé mesta lygi sem ég hef heyrt. Hann hlýtur að fara úr Stjörnuna, þetta comment er eins og Jökull sé að tala um lítil börn. Ég væri brjálaður ef ég væri Þorri yfir þessum ummælum.“

„Þetta er liðsíþrótt en hann er ekki í hóp, er það ekki óeðlilegt? Hann er að koma heim til að spila, kannski byrjar hann næsta leik ef hann spilar ekki gegn Breiðablik þá fer hann fyrir lok gluggans.“