Jose Mourinho, fyrrum stjóri Chelsea og núverandi stjóri Fenerbahce, fékk athyglisverð skilaboð frá sínum fyrrum leikmanni á dögunum.

Mourinho greinir sjálfur frá en hann gerði flotta hluti með Chelsea og vann deildina árið 2005 þar sem liðið fékk aðeins á sig 15 mörk.

Margir leikmenn Chelsea á þeim tíma eru enn í bandi við Mourinho en ljóst er að Chelsea er ekki á sama stað í dag og er í baráttu um Meistaradeildarsæti.

Þessi ónefndi aðili vildi meina það að þetta Chelsea lið frá 2005 gæti unnið núverandi lið Chelsea ef þeir fengu tvær vikur til að undirbúa sig fyrir verkefnið.

,,Það var einn leikmaður sem spilaði með okkur 2004-2005 sem sendi mér skilaboð fyrir nokkrum vikum. Ég segi ykkur ekki hver hann er en hann er í dag 45 ára eða eitthvað í þá áttina,“ sagði Mourinho.

,,Þetta var ekki Frank Lampard eða John Terry en þessi maður sagði við mig: ‘Stjóri, ef þú nærð að safna saman 2004-2005 liðinu hjá Chelsea og við æfum saman þá eftir tvær vikur þá myndum við vinna núverandi lið Chelsea.’

,,Þetta var augljóslega brandari en hann vildi benda á hversu góðir við vorum, við vorum svo góðir að 45 ára gamall maður gæti æft í tvær vikur og unnið núverandi lið Chelsea. Á meðal okkar þá erum við ennþá lið.“