Baldur Sigurðsson sérfræðingur Stöðvar 2 Sport efast um að Gylfi Már Sigurðsson aðstoðardómari hafi séð að boltinn væri inni í Garðabæ í kvöld. Stjarnan skoraði draugamark í 2-1 sigri liðsins á FH í kvöld þar sem dómari leiksins Vilhjálmur Alvar Þórarinsson var í sviðsljósinu.

Markalaust var í hálfleik en FH-ingar vildu fá vítaspyrnu Tómas Orri Róbertsson féll í teignum. Vilhjálmur Alvar dæmdi ekkert og voru FH-ingar verulega ósáttir.

Það var svo á 64 mínútu sem Stjarnan skoraði draugamark, Örvar Eggertsson skallaði þá boltann að marki en Mathias Rosenörn komst fyrir boltann. Vilhjálmur Alvar ætlaði ekki að dæma mark en Gylfi Már Sigurðsson, aðstoðardómari flaggaði markið. Í sjónvarpi var ómögulegt að segja hvort boltinn væri inni.

„Það eru átta manns fyrir framan hann og markvörður á línunni. Ákvörðun sem breytir leiknum,“ sagði Baldur Sigurðsson í beinni á Stöð2 Sport eftir leik og efaðist hann um að Gylfi hefði getað dæmt um þetta atvik með vissu.

Það var svo fjórum mínútum eftir þessa umdeildu ákvörðun sem Andri Rúnar Bjarnason skoraði fyrir Stjörnuna og kom liðinu í 2-0. Dagur Trautason lagaði stöðuna fyrir FH undir lok leiks en þar við sat.

Fyrstu umferð Bestu deildarinnar er þar með lokið og heldur ballið áfram um næstu helgi.