Fyrrum njósnari Liverpool, Ian Graham, segir að það hafi ekki verið ákvörðun Jurgen Klopp að semja við Mohamed Salah á sínum tíma.

Salah samdi við Liverpool árið 2017 er Klopp var við stjórnvölin en Þjóðverjinn var mun hrifnari af Julian Brandt á þeim tíma.

Graham segir að hann og sínir undirmenn hafi sannfært Klopp um að ná í Salah frá Roma á Ítalíu – ákvörðun sem félagið sér ekki eftir í dag enda um einn besta leikmann heims að ræða.

,,Það sem Jurgen vildi gera þetta sumar var að fá Julian Brandt sem var frábær leikmaður og Jurgen þekkti hann vel. Hann þekkti þýska markaðinn vel,“ sagði Graham.

,,Við vorum sammála um að Brandt væri góður ungur leikmaður en hann stóð ekki upp úr á sama hátt og Salah gerði.“

,,Miðað við okkar tölfræði þá var Mo besti ungi vængmaður Evrópu. Roma var undir pressu að selja vegna fjárhags félagsins og hann var fáanlegur á góðu verði.“

,,Jurgen má eiga það að hann var opinn, hann var til í að hlusta á okkur. Hann gaf okkur tækifæri á að sanna það að Mo væri betri kostur.“