Tímabilið fer senn að hefjast og var KR spáð 4. sæti af formönnum, þjálfurum og fyrirliðum, en þetta var opinberað á kynningarfundi deildarinnar í dag. Óskar er að fara inn í sitt fyrsta heila tímabil með KR, eftir að hafa tekið við á miðri leiktíð í fyrra.
Óskar ræddi við 433.is á fundinum og sagði hann að meginmarkmið KR væri að brúa það mikla bil sem myndast hefur frá þeim og upp í Bestu lið landsins.
„Sæti hefur litla þýðingu fyrir okkur. Við erum á þeim stað í dag að við þurfum að brúa bil sem hefur myndast á milli okkar og bestu liðanna. Það er ærið verkefni og ég held það sé hollt að horfa á það. Hversu hratt og hvers mikið við getum minnkað þetta bil verður bara að koma í ljós,“ sagði hann.
Leikmannahópur KR hefur tekið miklum breytingum í vetur, margir komið og farið, en segir Óskar að það sé ekki að sjá miðað við stöðuna á liðinu fyrir komandi leiktíð.
„Þú veist aldrei fyrr en á hólminn er komið en miðað við veturinn sé ég miklar framfarir á liðinu. Mér finnst við vera komnir miklu lengra og miklu nær því að vera liðið sem við viljum vera, vera nær sjálfsmyndinni sem við erum með sem lið. Það sem hefur gerst innan vallar hefur verið mjög jákvætt.
Það komu margir og fóru margir svo hópurinn er mjög breyttur, en mér finnst þessi hópur vera þannig að það er eins og þeir hafi verið saman í mörg ár. Það er í raun grunnurinn að öllu. Það gerist ekkert hjá liði nema þeir séu lið, séu samtaka, vinir, standi þétt við bakið á hvorum öðrum. Það upplifi ég í okkar klefa á hverjum degi. Mér finnst ekki endilega að það hafi komið á annan tug leikmanna og á annan tug farið. “
Ítarlegt viðtal við Óskar er í spilaranum.
