Tobias Thomsen var í upphafi vikunnar skyndilega mættur aftur í íslenska boltann og skrifaði undir hjá Íslandsmeisturum Breiðabliks. Halldór Árnason, þjálfari liðsins, er eðlilega sáttur með komu danska framherjans.

Thomsen, sem er 32 ára gamall, lék hér á landi frá 2017 til 2020, lengst af hjá KR en eitt tímabil með Val. Hann var iðinn við markaskorun í Vesturbænum.

Thomsen fór svo aftur til Danmerkur og var mikilvægur hlekkur í hliði Hvidovre sem vann sér loks sæti í dönsku úrvalsdeildinni fyrir síðustu leiktíð. Þar stóð hann sig sömuleiðis vel og skipti yfir í portúgölsku B-deildina í sumar. Hann datt skyndilega úr liðinu þar nú á dögunum og er mættur í Blika.

„Þetta gerðist mjög hratt. Hann er ekki nafn sem var á blaði, við erum búnir að skoða nokkra leikmenn í vetur. Svo bara kemur óvænt upp að hann sé laus í Portúgal og fyrsta sem maður hugsar er tíminn hans á íslandi. Hann átti mjög gott tímabil í KR,“ segir Halldór Árnason um Thomsen í nýjasta þætti af Íþróttavikunni á 433.is.

„Hann hefur í raun átt sín bestu ár eftir að hann fór frá Íslandi, með Hvidovre, sterkt B-deildarlið sem fór svo upp. Í fyrra skoraði hann átta mörk úr opnum leik fyrir Hvidovre. Liðinu gekk ekki vel en hann er með frábæra tölfræði, bara einn besti framherji Danmerkur þetta tímabil.“

Viðtalið við Halldór og nýjan þátt Íþróttavikunnar í heild verður hægt að nálgast í heild sinni á morgun, föstudag.