Jóhann Páll Ástvaldsson, íþróttafréttamaður á RÚV, var gestur Helga Fannars Sigurðssonar og Hrafnkels Freys Ágústssonar í nýjasta þætti Íþróttavikunnar, sem kemur út alla föstudaga á 433.is.

Það var til að mynda rætt um kvennalandsliðið, sem spilaði tvo fyrstu leiki sína í nýrri Þjóðadeild á dögunum. Liðið tapaði 3-2 gegn Frökkum og gerði markalaust jafntefli við Sviss. Liðið hefur hlotið töluverða gagnrýni eftir leikina.

„Eins og oft áður var liðið í erfiðleikjum við að halda í boltann og byggja upp spil. En svo þarf fólk að fara að horfa í að það er ekki styrkleiki þessara stelpna. Þær eru nokkrar góðar í því en það er mikið af leikmönnum sem þetta hentar ekki,“ sagði Hrafnkell áður en Jóhann tók til máls.

„Fólk segir að við þurfum að þróa liðið, með því að halda meira í boltann og þannig vinnum við bestu liðin. En við erum bara að spila leiki í dag og þá þurfum við kannski að spila aðeins öðruvísi.“

Hrafnkell tók undir þetta.

„Kannski þurfum við að bíða aðeins því ég veit að margar stelpur sem eru að koma upp eru betri í þessum þáttum leiksins.“