Jóhann Páll Ástvaldsson, íþróttafréttamaður á RÚV, var gestur Helga Fannars Sigurðssonar og Hrafnkels Freys Ágústssonar í nýjasta þætti Íþróttavikunnar, sem kemur út alla föstudaga á 433.is.

Jóhann er mikill KR-ingur og spenntur fyrir fyrsta heila tímabili Óskars Hrafns Þorvaldssonar við stjórnvölinn. Í þættinum ræddi hann einnig tíð Páls Kristjánssonar í formannsstól KR, en hann lét meðal annars goðsögnina Rúnar Kristinsson fara eftir tímabilið 2023. Páll gaf ekki kost á sér til áframhaldandi formannssetu nú.

„Það var þung ákvörðun að reka Rúnar á sínum tíma. Ég ætla ekkert endilega að segja að það hafi verið rétt ákvörðun. En KR endar með Óskar. Það var ákveðin krókaleið að þessu,“ sagði Jóhann.

„Möguleikinn að fá Óskar hefði ekki verið til staðar ef Rúnar væri hér áfram. En við þurfum enn að bíða og sjá, Óskar þarf að skila einhverju í sumar því sem stendur er Rúnar sá sigursælasti.“

Ítarlegri umræða um KR er í spilaranum.