Erik ten Hag fór í viðtal í heimalandinu, Hollandi, og fór í fyrsta sinn almennilega yfir tíma sinn sem stjóri Manchester United.

Ten Hag var rekinn frá United síðasta haust eftir rúm tvö ár hjá félaginu. Hann vann enska bikarinn og deildabikarinn á þeim tíma en gengið í deildinni var ekki ásættanlegt.

„Ég naut þess mjög að vera hjá Manchester United og í enskum fótbolta. Stuðningsmenn eru svo tryggir félaginu, leikmenn og allir í kringum liðið svo staðráðnir í að gera vel. Fyrir það er ég þakklátur,“ segir Ten Hag meðal annars í viðtalinu og heldur áfram.

„Við gátum líka gefið stuðningsmönnunum eitthvað til baka. Við unnum tvo titla eftir sex ár án titils. Mér fannst ég vel metinn og fann það þegar ég gekk um götur Manchester.“

Ten Hag lofsyngur þá heimavöll United, Old Trafford.

„Fyrir alla leiki fór ég einn inn á Old Trafford. Þetta er goðsagnakenndur staður þó hann sé tómur. Ef ég sakna einhvers sakna ég Old Trafford.“