Arnar Grétarsson fyrrum þjálfari Vals var í viðtali í hlaðvarpinu Chess after Dark þar sem hann ræddi síðasta sumar á Hlíðarenda, Arnar var rekinn úr starfi um mitt tímabil.

Arnar ræddi um komu Gylfa Þórs Sigurðssonar til félagsins og sagði frá því að Gylfi hefði orðið mjög reiður við liðsfélaga sína þegar þeir hugsuðu ekki nógu vel um sig að hans mati.

„Góður vinur minn sagði við mig að ég væri að setja þvílíka pressu á mig, auðvitað var það þannig,“ sagði Arnar í viðtalinu um komu Gylfa til Vals síðasta vor.

„Ég horfði samt ekki á það þannig, ég vissi hvernig drengur þetta væri. Þegar ég var að vinna erlendis notaði ég hann sem fyrirmynd, þegar ég ræddi við unga drengi og hvernig hann kom áfram.“

„Svo gerist það að hann lendir í meiðslum, er mikið meiddur. Hann spilar en er ekki 100 prósent, er að dæla í sig drasli. Æfði eitthvað en þetta var mjög erfitt, hann stóð sig samt vel.“

„Gylfi er ekki að koma heim og vera ánægður að koma í Val og fá eitthvað, honum langaði að vinna eitthvað.“

Hann segir svo frá sögu sem gerðist í klefanum hjá Val þegar nokkrir leikmenn Vals fóru í golf stuttu fyrir leik.

„Það kom upp tveimur dögum fyrir leik einu sinni að einhverjir fóru í golf, hann snappaði. Fyrir mér er það tabú, hann er mikill golfari en honum myndi aldrei detta það til hugar.“

„Ef þú ert að fá borgað í kringum milljón eins og margir hérna heima, það eru 2-3 leikir í viku og svo spilarðu tvo golfhringi inni á milli. Ég er dauðþreyttur að labba 10-11 kílómetra í golfi, endurheimtin er betri uppi í rúmi. Fótbolta er vinna þegar þú færð laun, það er alvara hér heima.·“