Aron Jóhannsson, leikmaður Vals, var gestur í nýjasta þætti Íþróttavikunnar á 433.is. Helgi Fannar Sigurðsson og Hrafnkell Freyr Ágústsson hafa umsjón með þættinum.

Það var farið yfir síðustu leiktíð hjá Val, en liðið hafnaði í 3. sæti Bestu deildarinnar, náði Evrópusæti en var 18 stigum frá toppliði Breiðabliks. Aron viðurkennir að tímabilið hafi verið vonbrigði.

„Ég held að það sé alveg klárt mál. Ég veit ekki hvort það sé gott eða slæmt en það eru bara vonbrigði á Hlíðarenda á hverju einasta ári ef þú vinnur ekki titilinn. Við erum með mjög sterkan og góðan hóp, þó það vanti 2-3 púsluspil. En við lendum í meiðslum, lykilmenn detta út og þá súrnar þetta aðeins,“ sagði Aron og hélt áfram.

„Maður getur hent fram endalaust af afsökunum en það er ekkert gott að kenna öllu öðru um. Eins og ég horfi á þetta lendum við bara í leiðinlegum kafla, miklum meiðslum. Við vorum nokkrir að spila á 30-40 prósentum, ekki alveg heilir. Svo horfirðu á markmiðið hverfa og þá súrnar þetta. Það er líka eitthvað sem við þurfum að læra sem leikmenn og lið, að þó maður tapi 1-2 leikjum þýðir ekki að henda inn handklæðinu.“

Þegar menn ræða Val er oft talað um aldurinn á liðinu, það sé of gamalt. Aron var spurður út í þetta.

„Ég er ekki þar. Mér finnst þetta svolítið skrýtin umræða, að Valsliðið sé of gamalt til að gera eitthvað. Ég held að þjálfarinn spili bara þeim leikmönnum sem hann treystir. Þá skiptir engu hvort þú ert tvítugur eða eins og Birkir Már, 58 ára. Ég skil samt alveg punktinn því um tíma var ég dottinn út, Gylfi dottinn út, Hólmar líka. Þá er auðvelt að segja að þeir séu bara svona gamlir,“ sagði hann.

Umræðan í heild er í spilaranum.