Mikael Nikulásson fyrrum þjálfari KFA var ekki hrifinn af þeirri umfjöllun sem hann sá um Hákon Rafn Valdimarsson markvörð Brentford eftir leik liðsins gegn Tottenham í gær.

Hákon spilaði sinn fyrsta leik í ensku úrvalsdeildinni í gær og byrjaði í 2-0 tapi gegn Tottenham. Rætt hefur verið um að Hákon hefði getað gert betur í báðum mörkunum hjá Tottenham.

„Mér finnst Hákon verið mjög öflugur með íslenska landsliðinu, meðvirknin með honum er mikil. Hann er í markinu hjá Brentford og kominn svona langt, þú ert kominn í þessa deild og þarft að standa þig eins og allir aðrir,“ sagði Mikael í Þungavigtinni í dag.

Mikael horfði á Völlinn á Símanum í gær þar sem farið var yfir leiki helgarinnar í ensku úrvalsdeildinni.

„Ég horfði í nokkrar mínútur á þáttinn á Sjónvarpi Símans, Hörður Magnússon er góður sjónvarpsmaður. Hann fer að tala um að ætla að sýna tvo frábæra hluti úr fyrri hálfleik hjá Hákoni,“ sagði Mikael sem segist hafa beðið spenntur.

„Fyrri hluturinn var sending og hitt var laust skot af 35 metra færi sem hann varði, svo var farið að afsaka að hann hefði ekki átt að gera betur í fyrsta markinu. Hann varði skot af 35 metra færi í ensku úrvalsdeildinni, hann átti eina frábæra sendingu fram völlinn. Hann fær á sig tvö mörk sem hann hafði getað gert betur í, hann var ekki frábær.“

Mikael sakar íslenska fjölmiðla um meðvirkni með Hákoni og fleiri íslenskum landsliðsmönnum.

„Þetta er ekki bara með Hákon, hann átti bara ekkert sérstakan leik. Flottur markvörður, ég trúi ekki að þessir íslensku strákar sem eru í A-landsliðinu þurfi að fá svona meðvirkni í fjölmiðlum. Ég beið svo spenntur að sjá þessa vörslu, var ekkert annað?“