Wayne Rooney, goðsögn Manchester United, segir að Marcus Rashford hljóti að líða ‘vandræðalega’ hjá félaginu þessa dagana.

Rashford er mikið í fréttunum á Englandi þessa stundina en hann fær ekkert að spila með félagsliði sínu sem er einmitt United.

Rooney rakst á Rashford á æfingasvæði United á dögunum en hann var að fara með sín eigin börn á knattspyrnuleik.

Rashford fær ekki að æfa með aðalliði United í dag og sást einn með sjúkraþjálfaranum á meðan foreldrar löbbuðu framhjá með börnin og tóku eftir því sem var í gangi.

,,Ég mætti á æfingasvæðið á sunnudaginn því ég var að fara með krakkana á leikinn og Marcus Rashford var þarna einn með sjúkraþjálfaranum,“ sagði Rooney.

,,Hann var þarna í kringum foreldrana sem voru að labba með börnin á leikinn. Ég horfði á hann og hugsaði með mér hversu vandræðalegt þetta væri. Hann er þarna einn og allir foreldrarnir eru bara að labba framhjá.“