Lánssamningi Stefan Bajcetic, leikmanns Liverpool, hjá RB Salzburg hefur verið rift og gengur hann þess í stað í raðir Las Palmas á Spáni.
Bajcetic er tvítugur Spánverji sem fór ungur að árum inn í yngri lið Liverpool og lék með aðalliðinu í fyrsta sinn á þarsíðustu leiktíð.
Miðjumaðurin var lánaður til Salzburg í sumar, en stjóri liðsins þá var Pep Lijnders, fyrrum aðstoðarmaður Jurgen Klopp hjá Liverpool. Hann var hins vegar látinn fara í desemer.
Bajcetic kom við sögu í 12 leikjum í austurrísku deildinni og 6 í Meistaradeildinni, en er nú farinn.
Las Palmas er í 15. sæti La Liga, efstu deildar Spánar, 3 stigum fyrir ofan fallsæti.
