Al-Hilal í Sádi Arabíu er nú talið líklegast til að semja við stórstjörnuna Mohamed Salah næsta sumar.

Það er Telegraph á Englandi sem greinir frá en Salah verður samningslaus hjá Liverpool eftir tímabilið.

Al-Hilal er búið að losa sig við aðra stórstjörnu, Neymar, sem er á leið til heimalandsins, Brasilíu, á nýjan leik.

Salah hefur verið orðaður við fjölmörg félög en talið er að Al-Hilal sé í bílstjórasætinu þegar kemur að peningum og spennandi tilboði.

Salah hefur áður verið orðaður við Sádi en Liverpool hafnaði 200 milljóna punda tilboði í leikmanninn í fyrra.