Al-Nassr, félag Cristiano Ronaldo, mun sækja framherja á allra næstunni en ekki er ljóst hvort það verði Victor Boniface hjá Bayer Leverkusen eða Jhon Duran hjá Aston Villa.
Boniface er 24 ára gamall Nígeríumaður sem er kominn með sjö mörk fyrir Þýskalandsmeistara Leverkusen á leiktíðinni.
Al-Nassr og Leverkusen hafa þegar náð munnlegu samkomulagi um Boniface og verður kaupverðið um 50 milljónir punda.
Sádiarabíska félagið hefur hins vegar ekki ákveðið sig endanlega hvort það ætli að sækja hann eða hinn kólumbíska Duran.
Duran er 21 árs gamall og er kominn með 12 mörk á leiktíðinni með Villa þrátt fyrir að vera í aukahlutverki.
Al-Nassr sýndi Darwin Nunez, framherja Liverpool, einnig áhuga en enska félagið tekur ekki í mál að selja.
